意甲今轮最後一场，沙兰力坦拿主场迎战祖云达斯。祖云达斯因造假帐被扣分後，联赛已经争标无望，相信嚟紧重心都会放喺盃赛上，斗心成疑，不过佢哋连续3场联赛不胜兼失10球，今场点都会搞番好个後防，睇番祖记今季联赛作客踢法保守，近9仗8次开2球或以下，今场一於追2.5球入球细。（Now 638周三凌晨3时45分直播）

祖云达斯因过去3年造假帐同夸大球会收入，被意大利足总扣15分，依家以23分排13位，只比今场对手沙兰力坦拿多2分，同榜首拿玻里嘅56分有大段距离，肯定争标无望，要争前4都有啲忟水，如果要踢下届欧洲赛，赢盃赛系最好途径。

「老妇人」刚喺意盃8强以1比0淘汰拉素，4强斗国际米兰，另一边系克雷莫纳对费伦天拿，只要淘汰国米，相信捧盃唔难。另外，月中欧霸附加赛斗南特争16强资格，都系球队目标，只要赢到欧霸，下届又有欧联玩，所以联赛对佢哋嚟讲，只系练兵场地。

不过，由於之前3场不胜，合共失咗10球，以祖云达斯兵力嚟讲又系肉酸咗啲，加上今场有射手米利克受伤缺阵，故此，今场对住攻力唔算好嘅沙兰力坦拿，应该会加强防守，减少失波之後再求一击即中赢波。沙兰力坦拿实力所限，近8场联赛只得1胜，对住祖云达斯亦只会死守博1分，加上祖记近9场联赛作客8次开细嘅表现，相信今场入球唔会多，入球细玩得过。