今晚德国盃16强上演德甲内讧，波琴主场硬撼多蒙特。波琴喺联赛深受降班威胁，无力兼顾盃赛，「蜜蜂兵团」多蒙特挟4连胜之势，有力赢波晋级，客胜有计。（有线661及601台周四凌晨3时45分直播）

波琴复赛後表现唔错，近4仗联赛获2胜2负，其中上仗更大胜贺芬咸5比2，不过睇番呢4仗佢哋场场有失波，合共失咗10粒，防守确系唔稳阵。再睇佢哋依家喺联赛只排第15位，比起尾3嘅史特加只系多3分咁大把，护级形势仍未乐观，相信波琴冇乜心力放喺盃赛，就算今仗有地利亦不宜高估。

另一边厢，今季跌跌碰碰嘅「蜜蜂兵团」多蒙特，自从复赛後重拾佳态，近4仗联赛全部赢晒，狂轰13球，攻力强劲。小将祖迪比宁咸及基奥云尼雷拿状态大勇，其中基奥云尼雷拿屡建奇功，呢4仗入咗3粒，而且箭头施巴斯坦贺拿亦战胜癌魔复出，上仗大胜弗赖堡5比1之役建功，取得佢加盟多蒙特後首个士哥，嗰日仲系世界癌症日，入波对佢可谓意义重大，亦令大军士气大振，今场必定食住个势喺盃赛发围，客胜咪错过。