曼联今季表现令人眼前一亮，唔少昔日嘅边缘球员喺坦哈格领导下都脱胎换骨，右闸达洛治就系其中之一。呢位葡萄牙国脚同曼联合约只剩1年半，据报喺坦哈格要求下已经接近达成协议，人工更加「3级跳」，确定佢曼联主力嘅地位。

23岁嘅达洛治5年前已经加盟曼联，但要到今季先真正上位，球会早前已宣布启动佢合约内续约1年条款(到2024年)，不过坦哈格就讲明要佢长期留队，西班牙《世界体育报》报道，达洛治已经同曼联倾掂续约，巴塞隆拿挖角计划正式终止。

英国《太阳报》消息指，达洛治依家周薪系3万镑，但新约会大幅提升至8.5万镑，而且仲会另加奖金条款。自世界盃後一直受伤患困扰嘅达洛治，近日已经重投操练，有望复出抢番云比沙卡嘅正选右闸位置。