曼联今季喺坦哈格领军下攻守兼备成绩突出，但寻晚对列斯联只能踢成2比2失分，主场13连胜走势被中止，列斯联看守领队史古巴拿成功顶住坦哈格，至於佢用咩方法破解对方强攻，就系「靠近中路」！

《天空体育》喺半场期间，影到史古巴拿手上嘅笔记，写住「靠近中路」、「彼此信任」同「保持冷静」，列斯联球员喺场上确实做咗呢3件事，开赛短时间先入波，然後一直主动抢攻，半场领先1比0，好快下半场列斯联再入多粒，虽然未能保持胜局完场，被曼联逼和2比2，但对於刚换帅嘅列斯联无疑系好开始。

最重要嘅系，嚟紧双方周末立即进行联赛第2次碰头，列斯联返主场再斗曼联，到时只要佢哋继续「靠近中路」、「彼此信任」同「保持冷静」，相信曼联都几难应付。

资料显示，40岁嘅史古巴拿上季系列斯联U21主帅，马殊下台後会方安排佢担任看守领队，估唔到首场英超领军就有好表现，如果下场击败曼联，随时有望坐正。

0