曼联今季成绩急速起飞，领队坦哈格嘅功力已获肯定，不过原来巴西中场卡斯米路先系队中「灵魂」，曼联周四(9日)喺呢位中停赛下，主场只能够逼和列斯联2比2，数据显示「红魔鬼」喺卡斯米路上阵同缺阵下，成绩判若两队。

据Opta数据显示，卡斯米路今季英超13次正选上阵，曼联平均每场拎到2.3分，场均失球只有0.7球，但曼联喺佢做後备或缺阵嘅联赛，场均只系拎得1.4分，平均失球数字就暴升至2.1球，今场对列斯联就系最佳例子，而佢嘅3场英超波监仍有2场未执行。

曼联名宿坚尼表示：「有时你要等到一个球员缺阵，先会明白佢有几重要，伟大球员系可以影响比赛，令赛事进展更加顺利。卡斯米路系好重要嘅球员，我哋睇到曼联冇咗佢会变成点，呢啲就系伟大球员嘅影响力。」