周四(9日)凌晨英超补赛，曼联主场迎战啱啱换帅嘅列斯联遇上顽抗，喺落後2球嘅劣势下，连追2球逼和对手2比2。虽然奥脱福球场12连胜走势断缆，不过就成功打番起查顿辛祖，佢相隔3个半月後再喺英超上阵，即刻入波帮曼联执番1分，领队坦哈格都赞：「辛祖返嚟啦！」

列斯联日前将领队马殊炒鱿，球员知耻近乎勇大踢争气波，开波只系55秒，意大利新星基诺图禁区顶割草式劲射入网。曼联失守後疯狂反扑，加拿祖有2次黄金机会分别射斜同被救空门，沙比萨放冷箭亦被梅斯利亚飞身扑出，曼联入唔列波，48分钟更有华拉尼摆乌龙输到0比2。

坦哈格59分钟换入查顿辛祖，形势立即出现逆转，3分钟後拉舒福特接应达洛治右路传中顶入，70分钟查顿辛祖左路突破，同劳基梳尔合作撕破列斯联防线，最後查顿辛祖禁区内快脚射入。曼联追成平手後继续狂攻，可惜未能拎到反胜入球。

查顿辛祖对上一次喺英超上阵已经系上年10月，之後因伤患及心理问题一直雪藏，直到上星期先喺英联盃复出，坦哈格赛後表示：「今场感觉复杂，劣势下抢到分当然开心，但我哋亦都失咗2分，差劲嘅开局系不能接受......对於查顿辛祖我好开心，佢返嚟啦！我哋都知佢系个出色球员，佢好努力，我好享受佢嘅演出。」