喺冬季大事增兵嘅车路士，周六(11日)英超作客同韦斯咸踢成1比1平手，连续3场联赛打和失分。身价1亿欧元嘅乌克兰翼锋梅迪历，今场表现继续令人失望，连续第2场交出「零蛋数据」，佢赛後更喺社交网Like咗一则批评古古列拿嘅贴文，疑似怪责队友拖累。

梅迪历连续第2场以正选左翼身份上阵，继上仗对富咸後，再一次录得0入球、0助攻、0射门、0创造机会、0扭波过人嘅纪录，连续2场交出「零蛋数据」，表现同佢嘅身价完全唔成正比，不过有球迷就认为左翼衞古古列拿表现差，令到梅迪历冇支援下交唔到表现。

有网民发现，梅迪历赛後用自己IG帐户Like咗一段批评古古列拿嘅帖文，内容系指呢位西班牙球星唔传波畀梅迪历，不过梅迪历之後就取消赞好，但有关画面已经畀网民Cap低疯传。