周日(12日)凌晨法甲，榜首巴黎圣日耳门(PSG)缺少2位受伤球星基利安麦巴比、美斯之下，作客1比3不敌摩纳哥，继日前法足盃出局後再输1场。PSG「MNM锋线」今仗得番尼马撑场，明显独力难支，呢位巴西国脚老羞成怒，比赛期间埋怨队友域天拿、伊基迪基表现差，引起内讧疑云。

巴黎圣日耳门阵容不整，加上有欧联後顾之忧，今仗表现患得患失，开波4分钟就失守，被摩纳哥中场高路云射入大门。其後PSG防线失误，宾耶达为摩纳哥射成2比0，当时只系开波18分钟。

PSG连失2球後如梦初醒，由16岁小将沙利艾美利射入追至1比2。战至上半场补时，宾耶达再建一功，帮摩纳哥领先至3比1，呢位32岁法国国脚今仗入2球及1次助攻，表现非常抢镜。

换边之後，摩纳哥继续创造唔少攻势，可惜未能再增添入波，PSG只系输1比3已经算好彩。

PSG唔止输波，而且疑似发生内讧，法国《队报》指尼马喺比赛中多次向队友作出埋怨，包括指责中场域天拿企位差，冇正确接应及传波，另外亦不满锋线拍档伊基迪基嘅表现，出言指责。

巴黎圣日耳门将於周三(15日)凌晨欧联16强首回合主场对拜仁慕尼黑，如果呢个时候出现内讧，肯定削弱球队胜算，好消息系美斯应该可以复出对拜仁。