今晚欧霸淘汰圈附加赛次回合焦点大战，英超曼联返主场再斗巴塞隆拿。「红魔鬼」首回合一度反先下被追和，今仗会先巩固防守，佢哋近年面对西甲球队旺少交收；巴塞方面双星柏迪及加维齐齐缺阵，创造力大减，嚟到奥脱福亦唔敢贸然抢攻，宁捧2.5球嘅入球细。

（Now 643周五凌晨4时直播）

两大劲旅首回合交锋，曼联凭拉舒福特入波兼逼到对手摆乌龙，一度反超前，但最终都系畀主场嘅巴塞逼和2比2，非常唔抵，由於作客入球优惠已经取消，意味今仗胜方先可以晋级。曼联有中坚利辛度马天尼斯刑满复出，有助增强後场防守及组织力，吸取首回合教训，佢哋必定踢得更为谨慎。拉舒福特状态弗到震，各项赛事近17仗狂轰16粒，占咗球队总入球4成咁多，明显倚赖佢数胡，但亦势必成为巴塞严防对象，或因此影响曼联进攻火力。

巴塞首回合千辛万苦下逼和对手，叫做唔使落後迎接次回合，但付出沉重代价，柏迪拉伤退下火线，另一新星加维则累积3张黄牌，今晚要自动停赛，连同仍然养伤嘅布斯基斯及奥士文尼迪比利，中前场创造力必然受损，令箭头罗拔利云度夫斯基孤掌难鸣，加上首回合面对「红魔」嘅逼抢打法，巴塞吃尽苦头，今仗会以稳为先。翻查纪录，曼联近6次欧洲赛面对西甲球队，有5次开2球或以下，2.5球入球细更可取。