曼联领队坦哈格今季上任後，先後向阿积士挖走2个旧部利辛度马天尼斯同安东尼马菲奥斯，据英国《每日镜报》爆料，坦哈格夏天打算再挖阿积士嘅宝藏，今次睇中加纳翼锋古达斯，荷兰名将云巴士顿早前仲大赞佢「劲过安东尼」。

22岁嘅古达斯喺坦哈格执教嗰阵只系大後备，不过今季担正就大放异彩，今季已有10个联赛入波，代表加纳出战卡塔尔世盃亦有突出表现，对南韩一仗连入2球。由於古达斯同阿积士只剩2年合约，预计转会费约4,800万镑，爱华顿同利物浦之前亦曾同佢扯上关系。

荷兰名宿云巴士顿早前表示：「我发现古达斯系比安东尼更出色嘅球员，安东尼系好波，但有时会唔知做乜，古达斯技术更加好同更清晰；安东尼速度快，但古达斯更聪明同更全面，我锺意古达斯多过安东尼。」