欧联8强诞生！周四(16日)凌晨重头戏，利物浦作客皇家马德里未有奇迹出现，再输0比1下两回合合计惨败2比6出局，英超球会喺8强只系得番曼城同车路士两队，近3届欧联首次唔系8强最大户，反而意甲有拿玻里、AC米兰同国际米兰入围，荣升欧洲霸主。

首回合输2比5嘅利物浦，今仗作客皇马主动抢攻，两队互有攻守制造唔少埋门，可惜达云纽尼斯、迪亚高祖达先後失机，78分钟更被皇马把握漏洞，云尼斯奥斯祖利亚射门跣脚，但仍可以将个波拨横，交畀无人看管嘅宾施马轻松射入，协助皇马再赢1比0。

利物浦领队高普赛後表示：「作客皇马要追3球，你需要一次好特别嘅表现，但我哋做唔到......利物浦希望每年都参加欧联，所以我哋有个好重要嘅任务(英超前4)，国际赛之後系关键1星期，连对曼城、车路士同阿仙奴，呢个星期将会决定今季成败。」

欧联8强全部诞生，英超对上2届都有3队打入8强成为大户，但霸主地位今届就畀意甲抢走，拿玻里周四淘汰法兰克福後，同AC米兰、国际米兰一齐闯入8强，亦系意甲自05/06球季後，17年来首次有3队杀入欧联8强。8强同4强走线会喺周五(17日)进行抽签。

欧联8强名单：

国际米兰(意甲)

AC米兰(意甲)

拿玻里(意甲)

车路士(英超)

曼城(英超)

皇家马德里(西甲)

拜仁慕尼黑(德甲)