今日英超提早上演，要抢分重返前4嘅纽卡素，今轮作客诺定咸森林。纽卡素一直表现对办，但近期哑火，9场联赛有5场未能取得入波，合共只射入5球，8次开2球或以下，森林主场防守力不俗，肯定死守「喜鹊」博1分，今场玩2.5球入球细好过。（Now 621及611周六凌晨4时直播）

纽卡素喺英联盃冲击冠军失败後，将焦点放喺联赛度，虽然上场联赛终於击败狼队，终止5场不败，但球队进攻板斧唔多，一味死冲，中场组织力欠奉，一旦遇上死守嘅球队，就会老鼠拉龟，今场仲有祖连顿停赛，「喜鹊」再少一把尖刀，未必咁易搞得掂森林。

诺定咸森林近况持续下滑，上场作客1比3不敌热刺後，近5场只得2和3负，好彩佢哋主场仲叫交到货，近9场联赛4胜5和保持不败，当中7场开2球或以下。森林主帅谷巴近排兴用「4321」圣诞树阵式，尤其对强队更会屯重兵喺中後场，3个防守中场相对较少参与进攻，原则上会有成7个人参与防守。

除此之外，今场仲有喺纽卡素被闲置嘅舒维尔倒戈，佢曾经喺纽卡素效力7年，今场一定会大踢争气波，事实上纽卡素中场组织力唔算太强，米基尔阿米朗同辛特麦斯明都系反击时先有较大作用，如果森林刻意死守，「喜鹊」未必咬得入，2.5球入球细好路。