曼联领队坦哈格「乌鸦口」有料到！呢位荷兰主帅日前公开埋怨曼联伤兵众多，仲拖埋争标对手落水话：「我都想好似阿仙奴咁全季『夫添』比赛！」估唔到坦哈格嘅「怨念」果然有效，阿仙奴周五(17日)喺欧霸盃即连伤2个主力，日本国脚富安健洋更要拎拐杖离场！

曼联中场卡斯米路上仗联赛食红牌，将要停赛4场，坦哈格日前表示：「我哋唔系有受伤就系有停赛，全季只有对曼城一仗系全军候命，我都想好似阿仙奴咁全季『夫添』比赛！」不过有球迷指出，阿仙奴首席前锋加比尔捷西斯抖咗3个月啱啱先复出，伊美路维上半季几乎冇踢过，而艾利尼就已因伤提早收咧。

坦哈格嘅「怨念」立即见效，阿仙奴喺欧霸盃对士砵亭一仗，富安健洋开波9分钟就拉伤退下火线，中坚威廉沙列巴亦喺21分钟因背伤离场，赛後富安健洋被影到拎住拐杖，领队阿迪达表示：「富安健洋个情况唔乐观，佢个反应同表现已经见到，实际情况要等检查先知。」