今晚曼联同阿仙奴喺欧霸盃分途出击，曼联对贝迪斯，阿仙奴斗士砵亭，喺赛前记者会，曼联领队坦哈格一番言论焫着阿仙奴，佢竟然话曼联今季长期受伤病影响，阿仙奴就冇伤病场场「夫添」，被厂迷丧插。

坦哈格首季执教曼联，佢嘅经历就如过山车，受伤、停赛、主力离队、捧盃、大败，可能过份刺激，搞到坦哈格「跳掣」，佢先确认加拿祖将会缺阵数星期，安东尼马菲奥斯同安东尼马迪尔亦缺阵，基斯甸艾历臣同云迪碧克继续养伤。

跟住佢就嚟料：「我哋只有曼市打吡嗰场试过完整阵容，系今季唯一一次，其他时间我都每场都因为各种理由，无法排出最好阵容，阿仙奴就好好多，佢哋经常排『夫添』。」

呢番言论喺网上传开，被阿仙奴球迷围插，问坦哈格「系咪盲咗」，加比尔捷西斯抖咗4个月，上场先复出，依家又轮到尼基迪亚养伤，仲有长期伤兵伊美路维，汤马士柏迪都唔系场场出得，坦哈格竟然话阿仙奴冇伤病，睇嚟要去验眼喎。