今晚欧联8强首回合重头戏，曼城主场火并拜仁慕尼黑。曼城主帅哥迪奥拿首度喺欧联倒戈旧主，拜仁亦有曾带领车路士称霸欧洲嘅教头杜曹上任，两军都系今届防守最强之师，高手过招必小心为上，3.5球嘅入球细乃明智之选。（Now 643周三凌晨3时直播）

曼城主帅哥迪奥拿喺2013至2016年曾执教拜仁，虽然喺德甲所向披靡，但3季均喺欧联4强止步，成为离队主因，今次系佢首度於欧联倒戈相向，誓要还以颜色。

「蓝月亮」有艾宁夏兰特挂帅，攻力强劲，查实佢哋防守都有明显提升，今届8仗欧联取得5胜3和未输过，仅失3球，其中5仗冇失波，值得留意系该队场均达63.6%控球率，冠绝群雄，亦系成功巩固防线嘅关键。

另边厢，拜仁喺前任教头拿高斯文带领下，今届欧联8战全胜兼只失两粒，有7仗保持清白之身，系今届欧联防守最佳球队。虽然拿帅突然被炒令人愕然，但新上任嘅杜曹擅打盃赛，其中2021年中途接手车路士，喺欧联决赛以1比0击败佢「偶像」哥迪奥拿麾下嘅曼城，哥帅难免有所忌惮。

当然杜Sir初来甫到，早前又喺德盃爆冷畀弗赖堡踢出局，今仗作客必然唔敢冒进。睇番拜仁近4仗欧联全开3球或以下，大家实力又半斤八両，必定会小心谨慎，3.5球入球细有计。