周日（23日）英超头场之一，纽卡素主场对热刺，原本被视为势均力敌之战，点知热刺发波瘟，开波仅21分钟已连失5球，最终惨败1比6，争下届欧联入场券嘅机会愈来愈渺茫。

赛前纽卡素排第4位，领先打多1场嘅热刺3分，绝对系争前4嘅下届欧联入场券关键战。不过热刺犹如不设防，畀纽卡素予取予携，一开波祖连顿劲射被洛里斯救出不远，积及梅菲执鸡补中，极速打破僵局，6分钟轮到祖连顿窄位抽射破网，跟住梅菲远射又得手，加上箭头阿历山大伊沙克短时间内梅开二度，「喜鹊」喺开波仅21分钟已遥遥领先5粒，系英超史上第2快领先5比0嘅球队，只系比曼城喺2019年9月开波18分钟领先屈福特5比0慢少少，输到咁肉酸，部分热刺粉丝都冇眼睇拉队离场。

下半场热刺换走冇晒信心嘅门将洛里斯，由後备门将费沙科士打，射手哈利卡尼冇耐立即追番粒，但「喜鹊」前锋哥林威尔逊近门建功，最终热刺大败而回，赢波嘅纽卡素杀上第3位，争取下届欧联入场券机会愈来愈大。