AC米兰喺欧联4强首回合输畀国际米兰0比2，次回合反胜难度极高，佢哋最大希望就系葡萄牙前锋拉菲尔利亚奥复出，不过今场受伤离场嘅伊斯美宾拿沙，完场後被影到要拎住拐杖离场，疑似系严重受伤，1星期後上阵机会渺茫。

拉菲尔利亚奥因肌肉受伤缺阵首回合赛事，但预计次回合可以复出，佢今场同伊巴谦莫域坐喺场边观战，全程非常肉紧，但系当AC米兰输到0比2後，拉菲尔利亚奥被影到双手掩面，怀疑输到忍唔住喊。AC米兰教练皮奥利赛後指入球系今场胜负分野：「国际米兰上半场踢得更好，而且入咗2球，我哋下半场踢得更好，但系入唔到波，不过我相信我哋有能力喺次回合收复失地。」

AC米兰中场伊斯美宾拿沙今场只系踢咗18分钟就伤出，据报佢膝头出现问题，完场後更被影到拎住拐杖离开球场，周四(11日)会进行详细检查，但消息指佢多数赶唔切喺1星期後嘅次回合赛事披甲。