澳职季後赛总决赛将於6月3日上演，墨尔本城同中岸水手争逐冠军前，墨尔本城嘅34岁老将占美逊突然宣布，会喺呢场决赛後挂靴，不过中岸水手教练蒙哥马利就有微言，批评占美逊唔应该喺呢个时间「抢镜头」。

墨尔本城队长占美逊日前宣布喺总决赛後挂靴，之後就加入球会教练团，令佢即时成为焦点人物，中岸水手主帅蒙哥马利就表示：「我唔系唔尊重，但我对占美逊退休一啲兴趣都冇，我认为总决赛应该集中讨论2支今季澳职最好嘅球队，而唔系用其他话题抢镜头。如果系我，会等到总决赛後先宣布，不过呢个唔系我决定。」

占美逊效力过5间澳职球会，合共喺澳职上阵374场，而且仲效力过英超嘅保顿同瑞典超嘅哥登堡，墨尔本城对上3届杀入总决赛，占美逊都系队长，今季佢希望增添个人第2面总冠军奖牌。