正在阿根廷举行嘅世青盃进入争标最後直路，今晚将上演两场4强大战，其中尾场由意大利U20硬撼南韩U20。观察今届两队表现，意大利明显重攻轻守，只得1场冇失波，防线唔多稳阵，相反「小太极虎」今届法定时间未输过，守将发挥硬净到晕，今场受让必捧让球客胜。（周五清晨5时开赛）

意大利U20火力强劲，今届踢咗5仗已经攻入11粒，仲打起咗进攻中场卡沙迪；呢位效力雷丁嘅小将今届已经入咗6球，暂时排紧射手榜榜首，脚风甚顺。睇番意大利5战取得4胜1负，喺分组赛对巴西一度领先3球之下，最终险胜3比2，而且近两仗淘汰赛对英格兰同哥伦比亚，结果都未能保持清白之身，只有对弱旅多明尼加共和国先至冇出现失波，似乎意大利战术上比较偏重进攻，防守唔算稳健，呢点出战淘汰赛相对蚀底。

南韩U20上届夺得亚军令人喜出望外，估唔到今届被睇淡下继续有佳作，「小太极虎」5仗法定时间取得2胜3和未输过，唔单止分组赛爆冷击败法国，仲喺8强踢到加时，靠崔锡贤一箭定江山，以1比0气走「小超霸鹰」尼日利亚。要知道「小超霸鹰」赢过今仗对手意大利，可见「小太极虎」韧力十足。南韩惯性踢法以超强体能同对手周旋，战术亦多变，曾经用过442、4231、4411等阵式，会针对唔同对手作出灵活调整，相信今场绝对有能力顶住攻强守弱嘅意大利，让球客胜捧得过。