今晚日本天皇盃第2圈，日职「3哥」神户胜利船主场迎战日丙嘅长野帕塞罗。虽然牌面睇落强弱悬殊，不过胜利船近况麻麻，加上对弱队唔排除会轮换，遇上摆铁桶阵嘅长野帕塞罗，随时老鼠拉龟冇碇埋手，2.5球入球细值得捧场。（周三晚6时开赛）

由於胜利船上周中同巴塞隆拿踢热身赛，因此延至今周先打日皇盃，呢支开季顺风顺水嘅日职劲旅，近况有回落迹象，唔计对巴塞，近4仗正式赛事只得2胜1和1负，除咗上月中联赛畀柏雷素尔逼和1比1外，日前联赛造访大阪樱花，更因门将前川黛也完场前犯低级错误，出迎解围畀人截到个波送入空门，搞到输1比2兼让出榜首位置，都几打击士气。同时，胜利船今仗只系对弱旅，或会收起部分主力，点都有影响。

另一边厢，长野帕塞罗喺日丙只排第6位，近3仗联赛仲输晒添，状态差强人意。但长野帕塞罗都好有自知之明，每逢出战日皇盃踢得分外保守，尤其系对住劲旅更加小心，佢哋之前4次於日皇盃硬撼日职球队，全开2球或以下，包括2021年法定时间末段畀川崎前锋逼和1比1，互射12码饮恨，相信今仗都会照办煮碗，做缩头乌龟死守不出，胜利船想攻陷佢哋唔易，宁捧细盘。