因卷入家暴丑闻正受曼联调查嘅21岁新星格连活特，近日正式复操准备回归球坛！格连活特被发现租用私人训练场，并且聘用私人教练进行特训，早前曼联领队坦哈格已表明有意起用格连活特，不过最终点样「处置」呢位争议前锋，仍有待曼联高层决定。

英国《太阳报》发现，格连活特近日喺一个时租85镑(约850港元)嘅训练场，进行咗90分钟正式练习，佢请咗私人教练同门将，为佢进行控球、射门等特训，而且全程戴上体能监测仪器收集数据，态度非常认真。消息人士表示：「无论锺唔锺意格连活特，佢都希望重返球场，踢波系佢呢世人最擅长嘅事，只有重返球场先可以帮佢重过新生。」

格连活特上年1月被指虐打女友，被警方控告涉嫌强奸、伤人同控制他人等罪，虽然今年2月获撤销指控，但曼联继续以内部调查为由将佢停操停赛。坦哈格上月喺访问表明，如果格连活特可以复出，有力成为曼联前锋一份子，但亦有传闻指曼联考虑先将佢外借去其他球会「过冷河」。