沙特阿拉伯今个夏天疯狂收购球星，当中大多数都系年过30岁嘅老将，甚少「当打」球星会选择离开欧洲。不过26岁葡萄牙国脚鲁宾尼维斯，周六(24日)正式加盟希拉尔，转会费达4,700万镑(约4.7亿港元)，佢更专登拍片向狼队球迷道别，期间忍唔住激动痛哭，表明将来会回归狼队。

鲁宾尼维斯虽然受到巴塞隆拿等班霸垂青，但最终意外加盟希拉尔，4,700万镑转会费亦成为财困狼队嘅「救命金」。鲁宾尼维斯离开前，特别喺狼队主场中间拍摄告别影片：「我唔知点样多谢大家一直以来嘅支持，你哋对我嘅爱超越现实，我依家同你哋(球迷)一样，永远都系狼队嘅拥趸。」

鲁宾尼维斯喺呢段超过3分钟嘅告别感言中，一度激动爆喊，佢最後更承诺有一日会回归狼队：「无论发生咩事，我永远都系狼队嘅人，终有一日我会返嚟狼队同大家见面，你哋嘅队长、鲁宾尼维斯。」鲁宾尼维斯历来为狼队上阵253场，攻入30球，系球迷至爱球员之一。