足球嘅越位条例引起无数争议，现任国际足协足球发展部主管嘅云格，2年前曾经提出全面改革越位条例，新例令进攻球员「全个身体」超越对方倒数第2名守将先算越位，呢个重大改革即将喺瑞典先试验，之後再扩大去意大利同荷兰，成功嘅话就会全面推行。

依家嘅越位条例，系进攻球员「身体任何有效入波部位」，只要稍微超过对方倒数第2名守将就系越位，即系经常引起争议嘅「体毛越位」。但云格提倡嘅新例，进攻球员「身体任何有效入波部位」，只要唔系全部「过界」都冇问题，大大有利进攻球员嘅发挥，势必令入球暴增。

据《DirecTV Sports》报道，国际足协会先喺瑞典男子U21联赛同女子U19联赛试行，之後就会去埋荷兰同意大利赛事。云格2年前提出嗰阵，本来希望喺2022卡塔尔世盃应用，但因为改革太大而赶唔切推出，依家就会按部就班推行，预计最终落实机会好大。