曼联门将迪基亚踏入7月1日正式约满成为自由身球员，可以免转会费加盟其他球会，根据英国《每日邮报》爆料，红魔鬼仍然准备同呢位32岁西班牙钢门倾续约，但要等佢周末举行完婚礼之後，再展开会谈。

迪基亚自2011年由马体会加盟曼联以来，近12年都系红魔鬼1号门将，但佢近年水准飘忽，令领队坦哈格有意签入新门将取代佢嘅正选位置。据悉迪基亚即使愿意减人工，由37.5万镑(约375万港元)周薪，减到20万镑(约200万港元)，但曼联方面仍有保留，以致迟迟未能达成续约协议，甚至等到佢已经恢复自由身，都仲未倾掂数。

迪基亚近日忙於筹备同女友Edurne Garcia嘅婚礼，唔得闲处理续约问题，曼联方面亦唔想打扰佢嘅喜事，估计双方要等多一段时间，先至会再见面讨论续约问题。

英国《太阳报》指曼联唔排除会放弃迪基亚，但希望佢唔好转投其他英超球队，若然迪基亚离队，红魔鬼好大机会收购国际米兰门将奥拿拿。国米行政总裁马罗塔承认曼联对奥拿拿有兴趣，但仲未正式提出收购，估计呢位27岁喀麦隆钢门身价为4,000万镑(约4亿港元)。