德国中场根度简今个夏天转投巴塞隆拿，曼城痛失一个球场上核心球员之余，更衣室同时亦失去一个领袖人物。继费兰甸奴、大衞施华同高柏尼之後，曼城近5年第4次要更换队长人选，而球迷投票显示，葡萄牙中坚鲁宾戴亚斯被视为最合适嘅队长接班人。

英国《曼彻斯特晚报》早前举行投票，叫球迷拣心水嘅曼城新队长人选，结果有47.2%投票去咗鲁宾戴亚斯身上，力压有34.9%得票嘅奇云迪布尼，而西班牙中场洛迪卡斯简迪就有13.8%得票排第3位。鲁宾戴亚斯只有26岁，但效力曼城3年都系後防核心，系出任长远队长嘅理想人选。

曼城领队哥迪奥拿选队长一向好民主，每季季前都会畀球员自己投票，选出最受自己友拥戴嘅球员做队长，根度简上年当选队长後曾表示：「哥迪奥拿近年唔会自己拣队长，佢觉得由球员自己决定系最好。」曼城球员除投票选队长外，另外仲会选出4位副队长人选。