巴西中场艾法美路上季以外借身份加盟利物浦，长时间受伤下全季只系踢过13分钟，最後黯然离队。不过据西班牙传媒报道，艾法美路有机会极速重返英超，目前白礼顿、纽卡素同阿士东维拉都有意「博一铺」，引入呢位玻璃脚嘅天才球星。

艾法美路依家只系26岁，出道初期被巴塞隆拿高价收购，亦曾22次为巴西国家队上阵，个人技术不庸置疑，但佢经常受伤就大大阻碍佢嘅事业发展。据《世界体育报》报道，祖云达斯打算正式放弃艾法美路，问题系佢高达1,500万镑(约1.5亿港元)嘅年薪，除英超同沙特球会之外，冇太多球员可以负担。

报道指白礼顿、纽卡素同阿士东维拉都密切注意艾法美路去向，其中白礼顿最为积极，尤其阿历斯麦亚里士打转投利物浦後，领队迪萨比需要搵一个技术型中场加盟，艾法美路就成为球队目标之一。