法甲劲旅巴黎圣日耳门(PSG)喺转会市场完成「帽子戏法」，宣布签入3位球员，包括皇马翼锋马高阿辛斯奥、士砵亭中场文路尔乌加迪、国际米兰中坚史坚尼亚，全面加强前中後三线实力，减轻一旦球星基利安麦巴比离队嘅影响。

PSG今次3位新兵之中，马高阿辛斯奥同史坚尼亚都系以自由身加盟，令球会悭番唔少转会费支出，其中马高阿辛斯奥签约3年，获得1,000万欧元(约8,590万港元)年薪，呢27岁西班牙国脚效力皇马9年，捧过3次欧联冠军等多项锦标，佢可以胜任锋线任何位置，PSG希望用马高阿辛斯奥填补美斯离队之後嘅位置。

至於28岁斯洛伐克国脚史坚尼亚早於1月已经决定加盟PSG，佢入「门」签约5年，正好可以代替离队嘅老将沙治奥拉莫斯。

另外，文路尔乌加迪虽然名气比唔上2位新队友，但佢今次转会费高达6,000万欧元(约5.2亿港元)，签约5年。呢位22岁乌拉圭国脚加盟之後，PSG有可能放弃近年表现备受批评嘅马高华拉堤。