38岁嘅艾舒利杨格今夏同阿士东维拉约满离队，但佢仲未挂靴，新球季续战英超，英国传媒报道，爱华顿正同杨格斟介，极有机会免费加盟，同爱华顿领队戴治再合作。

《Sky Sports》报道，爱华顿正同「杨左使」进行谈判，由於戴治嘅关系，艾舒利杨格已经拒绝其他英超同英冠球队嘅邀请，将会选定「拖肥糖」。

艾舒利杨格生涯踢过屈福特、阿士东维拉、曼联同国际米兰，总共上阵677场入85球，其中2003至05年屈福特仲喺英冠时期，佢同爱华顿现任主帅戴治做过队友，当时系戴治生涯晚期，杨格只系初出道，今次喺爱华顿，两人定必合作愉快。