英格兰U21赢欧国盃冠军，不过阿士东维拉嘅球迷就笑唔出，事关新星积及蓝斯喺8强战受伤後，检查後发现系跖骨骨折，将会错过维拉所有季前集训，同时英超开季头1个月都好可能会缺阵，对维拉新赛季争取好成绩造成重大打击。

积及蓝斯上季喺维拉火速上位，全季35次上阵有6个入波同6次助攻，当中11个入球贡献系喺艾美利上任後出现，可见佢喺艾美利战术入面扮演重要角色，受伤前亦系英格兰U21正选，今次佢预计要休养匹长达10个星期，对维拉影响好大。

维拉暑假会进行美国之旅，积及蓝斯唔能够参加之外，据报英超头4轮赛事都会缺阵，对手包括纽卡素、爱华顿、般尼同利物浦。维拉新一季除咗应付英超之外，仲要踢埋欧协联，对兵源会系一次重大考验。