据《The Athletic》等多间媒体报道，利物浦队长佐敦轩达臣将会接纳沙特豪门伊蒂法克斟介，呢间早前聘请谢拉特执教嘅球队，会向佐敦轩达臣提供约70万镑(约712万港元)天价合约。面对咁吸引嘅条件，转会亦无可厚非，不过佐敦轩达臣上年曾猛烈批评沙特、卡塔尔等国家嘅人权问题，今次决定转会就被球迷批评「出卖灵魂」。

谢拉特接手伊蒂法克後，头号目标系母会利物浦嘅佐敦轩达臣，呢位33岁中场同利物浦仲有2年合约，不过伊蒂法克极具诚意，愿意将佢目前19万镑(约193万港元)周薪合约，大幅提升至70万镑周薪。消息指佐敦轩达臣会喺今个星期内向利物浦表明意愿，之後两间球会就进行转会费谈判。

佐敦轩达臣系LGBTQIA+平权运动嘅代表人物之一，上年卡塔尔世盃前，曾公开批评卡塔尔、沙特等国家嘅人权状况系「恐怖、令人失望」，如果佢今次转会成功，就会成为首个去沙特落班嘅英格兰国脚，唔少球迷指佢为钱「出卖灵魂」，而且佐敦轩达臣若果离开欧洲球坛，亦好大机会缺席明年嘅欧国盃决赛周。