虽然沙特豪门希拉尔出到7亿欧元(约60.5亿港元)年薪，吸引基利安麦巴比加盟，但呢位24岁球星对於去当地搵食有保留，甚至传佢宁愿被巴黎圣日耳门(PSG)雪藏一季，都要留喺欧洲球坛。根据葡萄牙《纪录报》爆料，希拉尔做好两手准备，一旦收购麦巴比失败，就会用5,000万欧元(约4.3亿港元)争取签入利物浦前锋路尔斯戴亚斯。

希拉尔早前已经签入车路士後衞高列巴尼、狼队中场鲁宾尼维斯、拉素中场米连高域沙域，会方希望签入星级前锋，令前中後三线实力更加强大，但目标人选卢卡古已拒绝加盟，依家争取签基利安麦巴比，亦有失败风险，会方继续保持物色人选工作，包括睇中路尔斯戴亚斯。

呢位26岁哥伦比亚国脚上年1月由波图加盟利物浦，当时转会费已达到4,500万欧元，希拉尔今次只系开出5,000万欧元，红军未必接受。

路尔斯戴亚斯仲有4年合约在身，今季获得7号球衣，领队高普视佢为主力，希拉尔要买到呢位猛将，恐怕需要大幅加码转会费，先至有得倾。

利物浦早前已经同意将2位中场法宾奴泰华利斯、佐敦轩达臣分别出售畀沙特球队伊蒂哈德、伊蒂法克，至於路尔斯戴亚斯会唔会成为第3位去当地掘金嘅红军球员，大家拭目以待。