女子世盃F组赛事，法国女足同巴西女足合演瞩目大战。冠军热门法国女足首仗意外失分，不过呢支欧洲劲旅演出唔算差，赢唔到波有啲欠运，主帅连纳特大战经验丰富，重整旗鼓後有望回复正常水准，球队整体实力高於「森巴兵团」，往绩亦一面倒占优，今场撑法国女足赢波。

（Now 630周六晚6时直播）

法国女足上仗虽然被牙买加女足闷和，但全场有超过7成控球率，如果唔系把握力不足同门框阻挡，理应可以赢波而回。法国女足球员平均实力高强，双箭头尤珍娜拿森玛同戴安妮都系身经百战嘅星级球员，唔会受一时脚风唔顺影响，法国女足只要保持上场嘅控制力同创造力，绝对唔愁冇波入。

今届起用多位新人嘅巴西女足，首战4比0大炒巴拿马女足，不过对手被视为同组「鱼腩」，呢场大胜唔能够视为争冠能力嘅指标。上场为巴西女足连中三元嘅艾莉只有23岁，全队经验同实力仍逊法国女足一筹，翻查两军对上4次交手，法国女足有3胜1和压倒性优势，今场睇好法国女足反弹开W。