喺女子世盃首轮光芒四射嘅哥伦比亚前锋莲达卡丝杜，喺周四操练期间突然感到不适，更一度倒地昏迷超过90秒。虽然呢位18岁「抗癌射手」获军医即时抢救，回复意识後再送入医院检查，但能否继续上阵却系未知之数。

18岁嘅莲达卡丝杜曾患上卵巢癌，经过两年抗癌治疗後，如今不但入选国家队踢世盃，喺首轮对南韩女足，首度亮相即建功，写下12个月内分别喺Ｕ17世盃、Ｕ20世盃同世盃入波，被视为足球「童话故事」。不过周四训练期间，卡丝杜喺跑步期间突然按住胸口，跪低後更一度昏迷超过90秒，军医即时冲去抢救，好在佢上担架床後就恢复意识，即刻送入医院检查。

事後哥伦比亚女足官员透露，莲达卡丝杜系因为压力同体能需求太大而出现症状，但未知同佢之前嘅抗癌治疗有冇关系，亦冇交代佢可唔可以继续出席今届世盃。哥伦比亚女足会喺周日对德国女足，进行H组第二轮赛事。