今日下昼女子世盃16强爆发大战，瑞典女足硬撼美国女足。瑞典今届3战全胜弗到震，但以往对亲美国都输蚀，今仗一定小心翼翼，美国今届明显跌Watt，打淘汰赛更加唔敢轻举妄动，加上近年碰头旺少交收，宁捧2.5球细盘。（Now 630周日下午5时直播）

瑞典一向系女足劲旅，今届女世盃喺G组更加3仗赢晒，共轰9粒，包括大胜意大利女足5比0，霸气尽现。虽然状态大勇，但瑞典从未赢过女世盃冠军，因为常常遇上克星美国，两军之前喺女世盃曾6次碰头，瑞典只得1胜1和4负，对亲「美女」都冇啖好食，今仗必定有所忌惮。

衞冕嘅美国今届表现一般，喺E组3仗只得1胜2和，尾轮对住葡萄牙女足，如果唔系对手补时射门中柱唔入，随时已经出咗局。值得留意系「美女」攻力下滑，今届3战只入4粒，其中3球系首轮对越南女足取得，星级前锋阿历丝摩根、韦冰露都未开斋，只靠索菲亚史密丝同莲丝莉贺兰苦苦支撑，今仗仲有中场露丝拿维妮坐波监，更加唔敢冒进。翻查纪录，双方近9次交手，有7次开2球或以下，既然大家都求稳，入球细捧得过。