曼城继宣布以9,000万欧元(约7.7亿港元)签入RB莱比锡中坚加华度尔之後，增兵行动陆续有来，根据英国《太阳报》报道，「蓝月亮」计划斥资5,000万镑(约5亿港元)收购白礼顿翼锋三笘薰，填补马列斯离队之後嘅位置。

曼城队长根度简、马列斯今夏离队後，仅签入高华锡、加华度尔，领队哥迪奥拿希望再增兵，力争衞冕「三冠王」，并睇中三笘薰。呢位26岁日本国脚盘扭技术出色，上季为白礼顿各项赛事上阵41场入10球及9次助攻，包括7个英超入波，成为英格兰顶级联赛史上单季入波最多嘅日本球员。

哥迪奥拿早已对三笘薰虎视眈眈，曾经表示自己最喜欢嘅亚洲球员系佢：「三笘薰对英超产生重大影响，佢上季表现非常出色。」呢位翼锋现时仲有2年合约在身，白礼顿打算同佢续约5年。不过，呢支英超「神奇球队」近年曾经出售多位主力，唔排除会接受曼城报价。