去片睇侯克轰入40码重炮罚球

周一(7日)巴甲出现一粒足金金球，明尼路前锋侯克离门40码主射罚球，炮弹式直飞死角入波，令人联想起巴西左脚王卡路士喺1997年对法国，射入嘅世纪罚球。

今场由明尼路作客圣保罗，开赛仅4分钟，就出现金球，明尼路离门40码获得罚球，由於距离龙门比较远，全世界以为侯克会长传入禁区，但佢谂都唔谂，助跑之後用左脚劲射，直飞入网，可见呢位37岁老将仍然脚头十足。

侯克喺球坛足迹遍布甚广，出道初期去过日本搵食，曾效力日职球队川崎前锋，甚至踢过当时日乙球队北海道札幌冈萨多、东京绿茵，其後转投波图，捧过葡超、欧霸盃等冠军，亦踢过俄超辛尼特、中超上海上港，2年前重返巴甲效力明尼路，今季联赛已有7球进帐，包括今场轰入世界波，协助明尼路以2比0击败圣保罗，果然宝刀未老。