英国《镜报》爆料，曼联已经决定同中坚艾历拜利解约，容许呢位29岁科特迪瓦国脚自由转会，但系艾历拜利要求60万镑(约600万港元)「忠诚金」，会方拒绝支付，导致仍未能达成离队协议。

呢位科特迪瓦国脚2016年由维拉利尔加盟曼联以来，经常受伤，上季被外借去马赛，红魔鬼一早已经打算出售佢，并且只要求200万镑转会费，但仍然冇球会接货，最终提出同艾历拜利解约，从而节省一年400万镑人工支出。

据悉艾历拜利原本都同意解约，但就要求获得60万镑「忠诚金」，会方唔愿意支付，令解约存在变数。

其实艾历拜利就算离开曼联，都不愁出路，另一支英超球队富咸有意签佢，亦有可能去土耳其或者沙特阿拉伯搵食，早前就传出C朗效力嘅艾纳斯想签入艾历拜利，但之後冇咗下文。