已经38岁嘅前阿仙奴球星辛迪卡索拉，今夏离开卡塔尔豪门艾萨德後仍未言退，周四(17日)宣布重返母会奥维多。辛迪卡索拉时隔20年後再为奥维多效力，唔单止愿意收购西乙最低工资──1,500镑(约1.5万港元)周薪，仲答应将肖像权10%收入回馈返畀奥维多。

辛迪卡索拉效力艾萨德3年2次拎联赛冠军，夏天约满後有传佢获沙维邀请做巴塞隆拿助教，不过辛迪卡索拉未有退休打算，决定回归西乙嘅母会奥维多，奥维多系佢青训时间效力7年嘅球会，之後喺维拉利尔成名，再喺阿仙奴登上事业高峰，可惜之後亦连串伤患几乎收山，估唔到依家踢到38岁仍然可以逐鹿沙场。

据报辛迪卡索拉喺艾萨特周薪系25,000镑(约25万港元)，今次佢同奥维多签约1年，就只系收取西乙规定最低工资1,500镑，而且捐出肖像权10%收入畀奥维多作青训发展用途，对母会真系有情有义。