前英格兰国脚禾确特今夏约满修咸顿後，一直未有落班，34岁嘅佢周五(18日)喺社交网发声明，宣布结束球员生涯。

禾确特2005年喺修咸顿出道，未够17岁就以1,200万镑(约1.2亿港元)加盟阿仙奴，喺「兵工厂」效力12年，为球队攻入108球。禾确特离开阿仙奴後转投爱华顿，2020年回归母会修咸顿，上季随球队降班後约满离队。

禾确特早前曾经去雷丁跟操，亦传闻获英超嘅般尼茅夫招手，但佢经慎重考虑後决心挂靴，禾确特喺社交网表示：「由我10岁第1次着波砵，就展开呢段神奇旅程，由最初同朋友喺公园踢波，到喺世界最大嘅球场上比赛......我有幸同好多伟大球员做队友，亦好幸运仍然有球会向我提出聘约，但我觉得依家系时候结束，感激一直喺我身边嘅大家。」