阿仙奴周五(18日)凌晨安排闭门热身赛，最终3比0大胜卢顿，新加盟嘅门将大衞拉耶「地标战」踢60分钟保持不失，有力挑战兰斯达尔嘅正选位置，领队阿迪达亦表明唔会分1、2号，总之边个状态好、有表现就会做正选。

阿仙奴星期二(22日)凌晨先要作客水晶宫，球队趁住空档期安排同卢顿踢闭门热身，伤愈嘅辛真高、赖斯尼尔逊都有落场，新加盟嘅大衞拉耶亦上阵60分钟，「兵工厂」最终凭李安度杜沙特梅开二度，加上布卡约沙卡入波赢3比0。

对於大衞拉耶同兰斯达尔嘅争逐，阿迪达表明唔会有明显1号：「佢哋两个都系顶级球员，冇分1号同2号，就好似前锋、防中、翼锋等位置一样，球队每个位置都要有2个球员竞争。」