英格兰女足喺今届女子世盃表现出色，星期日(20日)将同西班牙女足争逐冠军宝座，荷兰籍领队威格曼再次展示出女足最强主帅实力，成为世盃史上(不论男女)首个带领两支球队入决赛嘅领队。英格兰足总行政总裁证实，威格曼会系英格兰男足下任领队候选人之一！

英格兰足总行政总裁布宁咸喺世盃决赛前表示：「英格兰(男子)领队系要搵最佳人选，如果个人选系女性都冇问题。威格曼多年来一直做得好好，佢有能力胜任足球坛所有工作，如果有一日佢想进军男子足球，呢个系一个有趣话题。」布宁咸强调：「我唔锺意男足一定要男人教嘅思维。」

修夫基同英格兰合约到2024年完结，普遍预期2024年欧国盃决赛周後，英格兰将会易帅，而威格曼喺英格兰女足合约去到2025年，如果佢能够带领英格兰女足赢完欧国盃再赢世盃，将会大大提高佢嘅叫座力。