今晚欧国外B组关键战，法国主场硬撼爱尔兰；法国虽然实力超班，但进攻过於倚赖以基利安麦巴比为首嘅快速反击，遇上死守球队会老鼠拉龟，加上法国喺B组遥遥领先，唔会心急抢攻。至於爱尔兰遇强势摆铁桶阵，何况两军近年碰头例少交收，2.5球入球细乃不二之选。（周五凌晨2时45分开赛）

法国喺头4战赢晒及保持清白之身，攻守兼备。但要留意，除咗首轮大胜荷兰4粒系赢得清风送爽外，其余3仗都表现一般，主因系「高卢鸡」最强武器系队长基利安麦巴比带领嘅快速反击，恰巧呢3仗嘅对手都全面龟缩，令法国缺少空间打突击。阵地战进攻一向唔系佢哋强项，因此赢得较为辛苦，其中对弱旅直布罗陀更加只赢3比0，不宜过分高估。

另边厢，爱尔兰头3轮1胜2负表现不俗，其中艾云费格逊等新星亦崭露头角，不过呢位白礼顿箭头赛前因伤退队，攻力大打折扣，而且佢哋面对强队点会敢乱咁攻，一定会加强防守先求稳阵，再博偷鸡。

翻查纪录，双方近7次正面交锋，有6次开2球或以下，包括两军喺次轮碰头，法国仅凭後衞班捷文柏华特建功险胜1粒，可见爱尔兰防守固若金汤，加上法国积分领先亦唔使心急，预计将会陷入胶着，唔慌多波入，细盘有分头捧得过。