今晚欧国外B组关键战，爱尔兰主场火并荷兰。爱尔兰冇咗超新星艾云费格逊，攻力大减；荷兰上仗大胜士气好，箭头韦格贺斯更重拾射门鞋，加上近期作客表现特醒，为争出线今仗必定搏尽，客胜有计。（周一凌晨2时45分开赛）

爱尔兰喺B组头4仗只得1胜3负，唯一胜仗系赢弱旅直布罗陀，超新星艾云费格逊嗰场亦有进帐。可惜呢位白礼顿前锋已因伤退队，冇咗佢爱尔兰攻力更为疲弱，包括上仗全场捱打下净吞法国两蛋。事实上，爱尔兰本身就欠缺强攻本钱，依家冇埋艾云费格逊，就算有地利亦不宜高估。

荷兰自朗奴高文回巢执教後，一直备受抨击，尤其佢大大声话要重拾「橙军」进攻足球传统，点知换来喺B组首轮吞法国4蛋嘅惨剧，之後欧国联亦只得「梗颈四」，畀人笑佢不自量力。好彩荷兰喺呢组连赢两场，其中上仗迎战希腊，朗奴高文改用3-4-2-1阵式，最终大胜3比0，加普同韦格贺斯齐齐破今季正式赛事入球荒，信心倍增，右翼衞杜费斯亦两度交出助攻，表现对办。

睇番B组除法国一枝独秀外，荷兰同希腊一样有6分，只领先爱尔兰3分，「橙军」踢少一场下，争取头两位出线稍占上风，今仗3分志在必得。加上荷兰近4仗作客获3胜1负，包括击败波兰同比利时，绝对唔会放过爱尔兰，热捧客胜。