曼联近日爆发「折翼」危机，安东尼马菲奥斯卷入家暴丑闻归队无期，另一翼锋查顿辛祖又同领队坦哈格反目面临雪藏，为解决翼锋人手短缺问题，据报曼联有意喺自由市场搵救兵，上星期同燕豪芬解约嘅安华艾加斯有望加盟，不过球迷对呢单转会就表现反感。

曼联短时间内失去2名翼锋球星，英国《每日邮报》爆料，球会准备同28岁荷兰翼锋安华艾加斯签约，呢位曾效力过阿士东维拉同爱华顿嘅球星，上季回流荷甲效力燕豪芬，但上星期宣布解约。转会权威Fabrizio Romano上星期曾贴出安华艾加斯同经理人喺酋长球场睇「仙魔大战」，指有英超同沙特球会向佢提出斟介。

安华艾加斯系阿积士青训出身，虽然未同坦哈格并事，但坦哈格对於呢位荷兰球员相当熟悉。曼联斟介消息传出後，唔少曼联球迷对呢位「英超弃将」能力表示怀疑，直指坦哈格签佢会摧毁阵中新星法根度柏利斯查成长，认为坦哈格应该将机会留畀新人，而唔系喺自由身执平货。