周三(20日)凌晨欧联G组赛事，曼城主场先落後下3比1反胜贝尔格莱德红星，衞冕之路有个好开始。不过曼城今场亦付出代价，葡萄牙中场贝拿度施华受伤，领队哥迪奥拿证实佢要抖「几个星期」，令球队排阵「有麻烦」。

曼城依家伤兵众多，今场只系排出8个後备(最多12人)，其中2个仲要系龙门。「蓝月亮」上半场虽然占上风，攻门超过20次，但贝拿度施华喺44分钟受伤退下火线，而且仲喺完半场前先失落後0比1，剧情发展超乎想像。

好在曼城下半场重现霸气，祖利安艾华利斯换边後2分钟闪电追平，呢位阿根廷前锋60分钟再下一城，加上欧联决赛入波功臣洛迪卡斯简迪73分钟建功，带领曼城反胜3比1完场。同组另一仗，RB莱比锡作客3比1赢年青人，同曼城并列榜首。

曼城领队哥迪奥拿赛後表示：「施华预计要抖几个星期，我哋依家有麻烦，5个非常重要嘅球员受伤，奇云迪布尼长抖、史东斯仲要多一段时间，高华锡可能就快复出，基亚利殊仲要多1星期至10日。不过我唔会埋怨伤兵问题，只要球员有决心捱过就冇问题。」