欧联分组赛开打即有戏剧性场面，E组拉素主场迎战马德里体育会，拉素喺上半场落後情况下，去到最後补时5分钟绝地扳平，而入波嘅竟然系弃关助攻嘅门将普维迪尔，佢亦成为欧联史上第2个生波入波嘅门将，职业生涯首场欧联就名留青史。

拉素今仗藉主场之利抢攻，不过马体会29分钟由巴里奥斯入波领先，拉素之後进一步施压，但面对施蒙尼教出嚟嘅铁血防守束手无策。去到第95分钟角球攻势，普维迪尔亦杀上前帮手，角球开出後先被解围，不过路尔斯阿拔图重获球权，左路传中畀普维迪尔冲前迎顶入网，为拉素逼和1比1完场。

29岁嘅普维迪尔成为欧联史上第4个入波门将，之前3个分别系佐治毕特(3球)、保拉特同安耶马，当中佐治毕特同安耶马都系用12码入波，只有普维迪尔同保拉特系生波建功。拉素教练沙利赛後表示：「普维迪尔入波唔系幸运，而系公平嘅彰显，我哋踢得好过马体会太多，呢1分系我哋应得嘅。」