查顿辛祖因纪律问题被踢出曼联大名单，无缘作客拜仁慕尼黑，佢同主帅坦哈格关系跌至冰点，归队无期，不过辛祖似乎冇所谓，更被爆喺对拜仁一仗开赛前唔够一小时打机，对於曼联似乎唔太关心。

《进球网》爆料，曼联作客拜仁开赛前唔够一小时，有球迷发现辛祖打紧《EAFC24》，呢款游戏仲未正式上线，但有唔少球星都收到体验版，已经开始打紧。报道指，辛祖同仍在养伤嘅罗马前锋谭美阿巴谦对打，被网民截图。

查顿辛祖今夏曾被列入清洗名单，但因身价同人工太高冇球队接收，早前对阿仙奴之前被踢出大名单，坦哈格话佢操练态度欠佳，辛祖其後驳斥指控，两人关系破裂，结果辛祖被逐出一队操练，依家再爆喺曼联比赛前打机，睇怕复出无期。