曼联领队坦哈格同翼锋查顿辛祖公开闹不和，曼联早前宣布对辛祖实施「封杀令」，停赛之余亦禁止佢跟一队练波，不过查顿辛祖迟迟唔肯认错，据报坦哈格近日再「加辣」，直情禁止佢出现喺训练场内任何一队区域，包括一队嘅饭堂。

查顿辛祖月初发声明批评坦哈格「讲大话」，随即被曼联禁止跟一队操练，只能够进行「单独训练计划」，不过英国《每日镜报》报道，坦哈格最近将禁令扩大，唔畀查顿辛祖喺卡宁顿训练基地用任何一队设施，包括健身器材同饭堂，连跟队友一齐食饭嘅资格都冇。

曼联消息人士向《每日镜报》透露：「其实解决方法非常简单，只要查顿辛祖向坦哈格道歉就搞掂，一定要有人让步，而让步嘅人一定唔系坦哈格。」查顿辛祖被处分後，曾经现身睇曼联U18比赛，据报曼联好可能会喺1月转会窗将佢割价出售。