英联盃第3圈赛事周四(28日)结束，瞩目大战纽卡素主场1比0淘汰曼城，同阿仙奴、利物浦、车路士等英超劲旅携手晋级。英联盃16强抽签随即举行，纽卡素抽中对衞冕嘅曼联，重演上届决赛翻版，有趣嘅系曼联今轮再次抽中喺奥脱福球场出赛，亦系曼联喺盃赛抽签连续第12次抽中主场出击，打破英格兰历史纪录！

上届决赛份子纽卡素，今场同曼城都以半力出战，曼城虽然控球率占优势，但埋门质素就唔及主队，结果纽卡素喺53分钟靠一次美妙组织，由阿历山大伊沙克近门射入全埸唯一入球。曼城领队哥迪奥拿赛後对输波表示唔在乎：「你以为我哋目标系做『4冠王』？我哋系有好高目标，但未至於唔满足做『3冠王』罗！」

英联盃16强抽签，纽卡素再度成为焦点赛事，佢哋抽中作客衞冕嘅曼联，曼联周三(27日)喺第3圈赛事，主场3比0大破水晶宫晋级，上届纽卡素喺决赛0比2输波，今次要去到奥脱福复仇。16强仲有韦斯咸对阿仙奴、般尼茅夫斗利物浦等英超大战(见表)。

「抽签王」曼联喺今次抽签亦创造纪录，佢哋由2021年开始，喺所有由抽签决定主客场嘅本土盃赛，连续第12次抽到「主场签」，之前11场成绩系9胜1和1负。据报低组别球会梳士贝利喺2017年至2019年间，曾经连续11次抽中盃赛主场，今次曼联成功改写历史。

英联盃16强抽签

曼联（英超） VS 纽卡素（英超）

车路士（英超） VS 布力般流浪（英冠）

韦斯咸（英超） VS 阿仙奴（英超）

般尼茅夫（英超） VS 利物浦（英超）

叶士域治（英冠） VS 富咸（英超）

爱华顿（英超） VS 般尼（英超）

埃克塞特（英甲） VS 米杜士堡（英冠）

曼斯菲（英乙） VS 维尔港（英甲）