曼联喺英联盃以3比0击败水晶宫，以借用身份由费伦天拿加盟嘅中场苏夫恩岩拉伯特，首次担任正选，虽然领队坦哈格安排佢出任左後衞，但呢位27岁摩洛哥国脚一样交足功课，大大提升变阵灵活性。

曼联2位左後衞劳基梳尔、杜维尔马拉西亚养伤，新签左闸利古朗上仗英超对般尼，亦不幸伤出，坦哈格今仗上半场搵苏夫恩岩拉伯特客串左闸。呢位「光头佬」喺今夏转会市场关闭前最後一刻成「魔」，但受伤患问题影响，直至上仗英超尾段，先至後备上阵首次为曼联披甲，虽然第1次踢正选，就要改为司职左後衞，但一样难唔到佢。美臣蒙特下半场被换走後，苏夫恩岩拉伯特踢番最擅长嘅中场，可以话系一位通天老倌。

岩拉伯特今仗踢咗61分钟，作出81次传波，有78次成功交畀队友，成功率达96%，包括6次长传有5次成功，而6次同对手对抗，有5次胜出，加上2次抢截，仲有1次射门。呢位中场硬汉大赞球队表现完美，自己唔介意踢任何位置：「我同领队讲过愿意踢任何位置，如果球队需要，就算出任门将都得，虽然今场踢左後衞，但我有唔少自由发挥空间，可以喺中场活动，感觉非常好。」曼联爆左闸荒之下，苏夫恩岩拉伯特未来日子应该有大把表现机会。